Friday, September 30, 2005

September 30

九月最後一日, 十月快來臨, 好快又十一月... 十二月... 一月... 二月...

人生依然無聊, 無聊是生活一部份, 生活很忙, 忙是不可缺, 缺了甚麼的生活... 我究竟在說甚麼.

工作上接到一份一唔記得就會做錯o既野, 以我o既記性大大的不利... 唉... 真係羅命...

無野想講, 十月見~




感覺步入了黑色森林, 出口呢??

Thursday, September 29, 2005

September 29

唔經唔覺九月都差唔多過完, 做野都做左個幾月...

感覺都唔錯丫, 如果唔洗讀書的話家陣o既生活應該幾happy... 算啦, 洗濕左個頭...

無咩想講, 今個國慶都要番學校... 唉...

捉馬騮... 玩期無限期壓後....灰...

September 28

禽日發現o既hunter已經入手, 呢期基本上係d打鬥場面. 又幾好睇喎我覺得... 我反而最唔鍾意睇古拉比加對旅團o個一段... 唔知點解...

今日番工依然係好唔閒, 人手少仲要調人落下面做野... 然後又再問人借人黎用... 咁即係點呢?? 個安排好鬼古怪.

無乜時間睇書, 愚蠢神又再上身. 救命!


還是基路亞好

Wednesday, September 28, 2005

September 27

呢排用得最多o既字就係忙, 忙已經係生活o既一部份. 好似唔忙就不能生活咁.

好彩暫時都未犯咩大錯, 咁已經好萬幸. 放左工仲要趕去交表, 見到個收表o既人施施然坐係度, 而我就趕頭趕命成個癲婆咁就好憤慨下...

今晚o個堂好悶, 諗下比左幾舊水上堂個阿sir好似呃錢咁就有少少唔多開皮, 鬼叫你要個學位. 唔係我神早走人!

訓...









等左N世耐本hunter 22終於都出左, 望過仲以為係龍珠Z, 因為隻蟻王實在太似施路喇...

Tuesday, September 27, 2005

September 26

今日番工忙左成日, 又係唔知忙咩但係好忙. 唔難做但濕碎o既野當一加加埋埋就好恐怖下.... 唉...
而今日有個前輩講左句好語重深長o既野... "你做左一百份岩o既野都無用, 只要有一份錯你就要揹鑊". 無論係咩機構, 咩公司, 永遠都係細o既薯仔做得多, 揹鑊多... 今日要remind自己, 樣樣事都要小心.


我都好想番工可以咁閒... (妄想中)

Monday, September 26, 2005

September 25

好忙呀好忙呀多事~~

依然唔知點解自己要咁忙, 但就真係好忙...

今日盡公民責任, 去左投票... (幾忙都要去o既)個選站我覺得就無上次咁好, 指示不足, d工作人員企係度唔知做乜... 唉...

聽日依然係忙, 忙... 忙...



雖然很喜歡這個熊貓公仔, 但似佢就可以免喇...

Sunday, September 25, 2005

September 23 + 24

好忙好忙... 忙到日記都無時間寫...

忙得黎唔知點解要忙, 好似每日都係度做緊一d無關重要o既野.

這就是人生??

好想抽呢套野... 唔知仲有無呢??

Friday, September 23, 2005

September 22

依然處於勁攰狀態. 今日繼續學做新野, 好多細節要記, 而我記性又麻麻... 好彩教o個個都幾好心機, 唔會話睇住我死o個種. 都要多謝佢一聲先~

睇怕都要搵本簿mark低晒佢... 要努力, 盡力做好先得...

又好想訓... 訓先~


Cultural difference...

Thursday, September 22, 2005

September 21

攰到發癲...

番工好攰, 因為要學新野同仲有幾多其他野要攪... 頭爆... 雖然唔係難但好多程序, 煩囉...

之後仲要番上去, 執野... 仲要見阿蛇, 番到屋企眼訓到爆.

仲有n咁多野未做... 好想訓覺... 都係去訓算.

有好多野, 當變到真實時, 係好惡頂o既

Tuesday, September 20, 2005

September 20

開始踏入"月餅週", 未來呢個星期分分鐘都係月餅做早餐... 救命!! 仲有一大堆生果, 其中包括我都幾唔鍾意食o既梨, 唔多like佢入面有d渣o既感覺, 又唔明點解d梨會越食越酸咁. 所以孔融讓梨絕對會發生係我身上. "阿媽阿爸你地食個大o既啦~"

講開食. 細細個(即係n年前)有一套好鍾意好鍾意睇o既卡通. 香港譯做"伙頭智多星", 大陸應該係叫"妙手小廚師". 印象最深刻係第一集陽一煮o既大大塊炸豬扒, 香脆得黎入面有汁o個隻. 食到味王係個咀度噴櫻花... 我到e+都未試過咁大塊好味o既炸豬扒, 可能就係因為咁, 成日覺得陽一煮d野特別好味(之後o個d咩伙頭仔昆布呀, 伙頭爸B呀, 都唔夠陽一fight).

講左咁多唔係重點, 重點係我發現出左一本 "妙手小廚師II"(漫晝)喎! 好奇之下, 望左望description, 竟然係講陽一同佢個仔囉... 陽一已經大到有仔喇!! (而我係老喇!!)真係光陰似箭... 嗚.... 唉... 不過人始終都要大個o既, 好似陽一咁做到自己鍾意做o既野故然係好, 就算做唔到. 時間都唔會停架. 不如開開心心好過啦~







有d衝動想買番本睇下添...
(陽一個仔好似無佢咁靚仔喎... 仲有, 唔知佢老婆係邊個呢?)

September 19

個blog唔知攪乜鬼, 成日upload唔到圖... 算, 睇下遲d補唔補得番.

今日放假, 咁又唔見幾舊水. 番長工就唔覺唔覺, 番逐個hour計o既工就好鬼覺... 人真係...

開始唔多舒服, 打左好多個"哈痴", 喉嚨痛+頭痛... 大鑊喇今次. 所以縱使今朝訓到好晏, 依然都係好似唔夠訓咁暈暈地, 希望可以快d復元啦~~




Post 到圖喇~
睇左Fantastic 4, 一經compare, 始終覺得蜘蛛俠型好多~




Monday, September 19, 2005

September 18

中秋節... 主角月亮玩失蹤...

不過有幾多個人係中秋節真係會賞月先得架? 煲蠟就大把, 亂拋垃圾o既就大把, 玩(假)燈籠o既就大把. 聽聞中國仲話想將中秋節加入咩世界文化乜乜... waste gas... 要加不如加新年, 起碼都有三日假, 擺明重要過中秋先~

既然無月賞, 我選擇左打機. 真三四猛將傳中, 雖然無lv5武器係有少少失望, 但個"立志mode"幾得意, 不過家陣都係卒仔一名... (我係周公僅o既手下... 經常唔理阿頭走去殺殺殺... haha). 玩埋今日, 聽日繼續博殺.


無緣見到靚靚月光lu... 睇住Wallpaper先啦~

Sunday, September 18, 2005

September 17

又過左繁忙o既一日, 又唔知自己忙左d乜, 穿梭於學校同home, 又要飛奔大陸... 唉... 時間唔等人. 今日終於都落出雨, 不過圓圓o既月亮就無乜機會蒲頭, 真係慘!

記得以前好得閒仲可以自己整wallpaper 用, 而家求其係網上搵, 仲好耐都唔換一次... 過去o既日子, 係咪永遠都番唔到黎呢???




當年劣作, 雖然唔係整得好好, 但都好有滿足感

Saturday, September 17, 2005

September 16

話咁快就八月十五... (後日就係), 中秋過後, 天氣唔知會唔會涼番d. 呢幾日行係街度好似燒豬咁. 好辛苦... 最憎熱... 好難想像非洲的人點生活, 日日都好似火燒咁, 仲要著咁多衫擋太陽... 所以覺得自己已經好幸福. 感謝上天.

今日老豆唔知發咩瘟, 好似係度發我脾四, 我又無得罪佢, 痴孖筋! 我已經無精神去理屋企o既無聊是非.

番得工, 上得堂黎, 我可以靜靜睇書o既時間真係不多...

有時諗下, 做動物都唔錯...





可以咁可愛就仲好~

Friday, September 16, 2005

September 14 + 15

由於禽日上唔到blog, 所以兩日當一日

感覺依然勁頹, 好多doubts

不斷比藉口自己, 安慰自己行左一條岩o既路, 有用嗎??

點都好, 自己揀o既要負責... 一係唔做, 一係就盡力做.

雖然KK迫我係一個月finish份thesis proposal, 我覺得都係mission impossible, 最怕對自己做o既野無信心. 一無信心我就實衰硬... 唉...


今日 (15號), 處長分派新工作, 好o既係佢編埋十一同十二月o既野, imply我過兩個月應該仲有得撈, 唔好o既係... 都無咩唔好, 我當學多份野, 但會唔會有人覺得我搶左佢d野黎做呢...



我都好想有對永遠都咁有熱誠o既眼睛...

Wednesday, September 14, 2005

September 13


心情依然沉重...

前路茫茫, 一大堆o既功課, reading... 工作...

私人時間幾乎係零

散亂心思

寫野也不起勁

想食野...

想食飯...





至高o個d...

Tuesday, September 13, 2005

September 12

心情, 依然唔多好.

太多野做但又唔知自己做緊乜o既感覺好難受. 份工ok, 雖然做o既野同我學o既野一d關係都無. 但我依然覺得自己好好彩可以搵到份準時放工o既工作.

另外一份, 同我學o既野有好大關係. 但我個腦實在分唔出太多精神去諗其他野...

我諗我要搵d精神支柱...


Try to be strong...

Monday, September 12, 2005

September 11

如果唔係讀ma, 我家陣應該打緊機
如果唔係讀ma, 我家陣應該好得閒
如果唔係讀ma, 我就唔會成日頭痛
如果唔係讀ma, 我就可以學其他野
如果唔係讀ma, 我就可以搵其他工

第一次有咁強烈o既感覺想放棄......

可以嗎?

Sunday, September 11, 2005

September 10

呢排好多野同時發生, 攪到個腦有d亂, 個頭有d暈. 我越黎越唔知道自己做緊d乜... 唉...

無聊之下開左Sims 2黎玩, 模擬人生究竟模擬到幾多人生呢, 我真係答唔到, 但唔多唔少令我明白到控制人口o既重要性.









開始時, 佢地係二人甜蜜家庭...












無幾耐之後... 就開枝散葉了...

Friday, September 09, 2005

September 9

山窮水盡中, 因為某d unexpectable o既原因今個月洗大左好多...... 入不敷支, 財神爺, I need you, where are you?? Come back~ pls ><"""

講番今日想講o既野, 禽晚上women's lit 時個lecturer講左個story in Aesop's Fable, 大概係話有隻獅子見到一幅畫, 幅畫係講一個人打死左隻獅子, 咁獅子就問: "幅畫係邊個畫o既呢?" 之後佢自問自答: "一定係個人話o既, 如果係獅子畫o既, 幅畫o既情境就會調轉." 同樣地, 我諗樓下o個d蛋糕都應該係由男人所設計... 因為... 睇左就明架喇!













男: "我願意!! 我願意比晒d錢你去瘦身~"

















男: "邊個邊個挖o既陷阱? 點解唔挖深d??"










男: "唔制呀~ 我要同d friends睇世界盃呀~~ Help! I need somebody help~"








September 8

呢幾日中午都好唔得閒咁. 好似今日咁就要走去銀行找卡數. 講起就激氣, 有乜理由張statement十年都唔到, 又唔知係寄失定點. 都係早早交左佢算 (家陣仙都唔仙下). 間銀行五個櫃台開得兩個, 鬼死咁慢, 排到我差d訓著. 之後又要撲去幫阿媽交電話費. 然後又要去羅photocopy. 咁就無左個lunch break... 唉.... 無奈.


我要發洩!!!

Thursday, September 08, 2005

September 7

好耐無望過樓下個地盤, 自從番左工之後就無乜點留意, (最衰係我放假時佢打樁, 到我搵到工佢就唔打喇). 唔經唔覺, 個地盤都變左好多lu... 好快, 窗外o既景就會變... 會變成....點呢??

2005 年 3月24日 -- 樁地




2005年9月7日 -- 底盤??

Wednesday, September 07, 2005

September 6

今日終於第一日番學. 本身以為番完工番學應該會好眼訓先岩. 但竟然無恰眼訓!!! 原因並唔係今日o既lesson好有趣. 而係我身體習慣左係o個個時間睇電視, 所以鬼打都無咁精神. 遲d番學實會烏下烏下... Take 兩科o既決定果然無錯... 廢事3科D晒咁仲樣衰.

上堂可以咁又唔錯... :p

Monday, September 05, 2005

September 5

講開Game, 呢排用模擬器玩"逆轉裁判", 因為漢化左所有特別有Feel. 見到成步堂成日滿頭大汗o個樣覺得好好笑.














諗諗下佢上庭都幾似我做thesis proposal, 當每樣證據都對你不利. 你應唔應該仲相信你個client (thesis)呢?? Well, 我都希望可以好似成步堂咁. 令到d地中海人士更加地中海... 取得最後勝利呢!!




Sunday, September 04, 2005

September 4



唉.... 唔經唔覺又要開學. 番左工之後覺得讀Master都幾無謂. 但無理由比左幾萬銀又唔讀落去. 真係洗濕左個頭.... 遲d就要回到日夜對住部機做assignment o既日子喇... 嗚...

今日打左成個下晝機, 之後就封番部機喇. 唔知幾時有機會再打.... (九月的真三國4猛將傳, 捉馬騮3中文版都好想玩, 唉....)

September 3


等左兩個星期, 聽日終於有得睇America's Next Top Model Cycle 4 大結局. 雖然知道Kahlen會輸, 但係都好期待睇~~ 不過聽日過後, 又唔知pearl幾時再做ANTM lu...